10.9.2018 Fir eis Sprooch!
Et héiert een ëmmer manner Lëtzebuergesch dobäussen. D’Lëtzebuerger Sprooch verschwënnt lues a lues aus dem ëffentleche Raum, a gëtt virun allem duerch Franséisch ersat.
Dobäi ass Franséisch fir 90% vun den Awunner eng schwéier Friemsprooch an et ginn vill Leit, déi sech ganz schwéier dinn fir Friemsproochen ze léieren (z.B. Leit mat Behënnerung, Leit mat Sproocheproblemer, Leit mat Léierschwieregkeeten) oder se vergiessen (al Leit, dement Leit, Leit déi laang am Ausland gelieft hunn) oder se nach net geléiert hunn ( Kanner, Auslänner).
Fir d’Gambia-Regierung an d’CSV-Deputéiert ass eis Sprooch awer leider net wichteg. Nom Referendum hu si de Niveau vum Sproochentest fir d’Nationalitéit ze kréien nach weider erofgesat. An der Spillschoul huet Gambia wäertvoll Lëtzebuergesch-Stonnen ewechgeholl an duerch Franséisch ersat. De Minister Meisch ass esouguer sou wäit gaangen an hien huet d’Franséisch Sprooch zur „langue de survie" vu Lëtzebuerg deklaréiert.
Wat muss elo gemaach ginn?
- D’Wichtegkeet vum Lëtzebuergesch, als eenzeg Nationalsprooch vum Land, am Alldag ervirsträichen.
- D'Presenz vun der Lëtzebuerger Sprooch verstäerken, op den Internetsäiten vu Gemengen a vum Staat, op de Stroosseschëlter a Bréiwer a iwwerall am ëffentlechen Räum.
- Lëtzebuergesch unerkennen loossen als eng offiziell Sprooch vun der EU.
- De gemeinsamen Schoulsystem op Lëtzebuergesch als beschten Integratiounswee ervirsträichen.
- d’Immigranten dozou motivéieren fir als éischt Sprooch Lëtzebuergesch ze léieren, an hinnen erlaben zu Lëtzebuerg ze liewen (an ze iwwerliewen), ouni zwéngend Franséisch mussen ze kënnen.
Dës Moossnahmen schueden kengem! Si stäerken d’Integratioun an hëllefen eiser. An dofir maachen mir dat!
